Կարատեն դա այն է, որ անտեղի որևէ մեկին չի շպրտում. Գրիգորիչը՝ Գոռ Վարդանյանի արարքի մասին

Փետրվարի 13-ին Երևանի քաղաքապետարանում՝ ավագանու նիստերի դահլիճում տեղի ունեցած քաշքշուկի շուրջ «Հայկական ժամանակ»-ը զրուցել է ՀՀԿ փոխնախագահ, պատգամավոր Գալուստ Սահակյանի հետ:

Պարոն Սահակյան, ի՞նչ կարծիք ունեք Երևանի քաղաքապետարանում տեղի ունեցած միջադեպի մասին:

Դա ինձ համար ընդունելի տարբերակ չի, որ ավագանիների նիստի ժամանակ նման իրավիճակներ լինեն: Չեմ էլ կարծում, որ դա բնորոշ է մեր իրականության համար: Ինձ թվում է համապատասխան մարմինները կնայեն և ճիշտ եզրակացության կգան:

Իսկ հայ կնոջը վայե՞լ էր նման պահվածքը:

Ընդհանրապես, եթե խոսքը գնում է հայ կնոջն, ապա սազական չէ, բայց նաև նրանք քաղաքական գործիչներ են և յուրաքանչյուրն իր տարբերակումներն ունի իրականության նկատմամբ: Մտածել էին այդպես հանդես գալ: Իմիջայլոց ասեմ, եթե նման տեսակի նյութ են բերում և, որը բավականին տհաճ է մարդկանց համար դա յուրաքանչյուր մարդու իրավունքն է: Նման խնդիրներ պետք է չառաջանան: Առավել ևս, եթե նման որևիցե խնդիր կա, ապա կարելի է համապատասխան մարմինների դիմել՝ արդարադատության նախարարությանը ու այդ խնդիրը կլուծվեր: Ի՞նչ կապ ուներ Երևանի քաղաքապետարանը, ես կարծում եմ տեղին չէր այդ ամենը:

Ավագանու ՀՀԿ անդամների արարքը տղամարդուն վայե՞լ էր:

Ես ախր այնտեղ չեմ եղել:

Դեպքի վայրից այդքան տեսանյութեր հրապարակվեց...

Այդ տեսանյութն ամեն մի տեղ տարբեր ձևի է ցույց տալիս: Եթե մեկը մյուսի վրա բան է ուզում լցնել բնական է, որ բոլորը խառնվում են իրար:

Մի քանի օր առաջ ակտիվիստները Բելգիայի վարչապետի վրա մայոնեզ լցրեցին՝ ի նշան բողոքի:

Մենք հայ ենք, հայի մտածելակերպով պետք է առաջ շարժվենք:

Բայց չեք կարծու՞մ, որ Երկիր Ծրանիի խմբակցության անդամների քայլը բողոքի արտահայտման մի ձև էր:

Մեզ համար բողոքի արտահայտման ձևերը մեծ նշանակություն ունեն, բայց մենք գնում ենք ամուր պետություն, ամուր սահմաններ, ամուր մտածողություն ունենալու համար: Նման երևույթները մեր ազգին հարիր երևույթներ չեն:

Պարոն Սահակյան, իսկ տեսա՞ք, թե քաղաքապետի խորհրդական Գոռ Վարդանյանն ինչպես է ԵԾ-ի կին ավագանուն վերցնում և դուրս հանում: Ֆեյսբուքահայությունը որակեց, որ գրեթե շպրտում է:

Ասեմ հետևյալը՝ կարատե մասնագիտությունը դա այն է, որ երբեք անտեղի տեղը որևէ մեկին չի շպրտում: Թեև չեմ հավատում, որ շպրտած լինի: